ޢަބްދުލްޢަޒީޒު ޖަމާލު އަބޫބަކުރު (މާވަށް)
ބަހެއްގައި ބޭނުންކުރާ ލަފުޒުތަކެއް އެއްފަހަރާ އުފަންވެ ނުވަތަ ބޭނުންނުކޮށް ހުރި ގިނަ ލަފުޒުތަކެއް އެއް ފަހަރާ ބޭނުންކުރާން ފެށުމަކީ ނުވަތަ، އާ އެތައް ލަފުޒެއް ނުވަތަ އެތައް މަފުހޫމެއް އެއް ފަހަރާ ބަސްފޮތަށް ވަނުމަކީ ބަސްވާރުން ވެސް މާ ގިނައިން ތަޖުރިބާ ކުރައްވައިފައި ވާނެ ކަމެއް ނޫނެވެ. މިއީ މި ކަން ހަމައެކަނި ރާއްޖޭގައި އޮތް ގޮތެއް ނޫނެވެ. ނަމަވެސް”ކޮވިޑް-ނަވާރަ“ ވެފައިވަނީ މުޅި ދުނިޔޭގެ އިޖުތިމާޢީ އިޤްތިޞާދީ އަދި އަދަބީ ވެއްޓަށް ވެސް ބޮޑެތި ބަދަލުތަކެއް ގެނުވި އެއްޗެކެވެ.
ބޭރު ބަސްބަހުގައި ވެސް ކުރީން އުފެދި، ބޭނުންކުރާން ނުޖެހި ހުރި ވަރަށް ގިނަ ލަފުޒުތައް ކޮވިޑާ ގުޅިގެން ފެންމަތިވިއެވެ. އެހެންވެ ބައެއް މީހުންނަށް ހީވީ އަލަށް ލަފުޒުތަކެއް އުފެއްދީ ކަމަށެވެ. މިކަން މިހެންވީ ހަމައެކަނި ދިވެހި ބަހަކަށް ނޫނެވެ. ބޭރު ބަސްބަހުގައި ވެސް މިކަން ހުރީ ހަމަ މިހެންނެވެ. އަޅުގަނޑު މައުޟޫޢާއިގެން ކުރިޔަށް ދިޔުމުގެ ކުރީން ބައެއް މިސާލުތައް ދަންނަވައިލާނަމެވެ.